بنگلہ دیش نے پاکستان کو 23 رنز سے ہرا کر ویمنز ٹی ٹوئنٹی ورلڈ کپ سے باہر کر دیا

ویمنز ٹی ٹوئنٹی ورلڈ کپ کے اہم میچ میں بنگلہ دیش نے پاکستان کو 23 رنز سے شکست دے دی۔ 124 رنز کے ہدف کے تعاقب میں پاکستانی ٹیم 20 اوورز میں 8 وکٹوں کے نقصان پر 100 رنز بنا سکی۔

بنگلہ دیش نے ٹاس جیت کر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 123 رنز بنائے۔ ابتدائی تین وکٹیں صرف 13 رنز پر گرنے کے باوجود کپتان نگار سلطانہ نے 36 رنز کی ذمہ دارانہ اننگز کھیلی، جبکہ شورنا اختر نے 22 گیندوں پر ناقابل شکست 39 رنز بنا کر ٹیم کو اچھے مجموعے تک پہنچایا۔

پاکستان کی جانب سے فاطمہ ثنا نے 18 رنز دے کر 2 وکٹیں حاصل کیں۔

ہدف کے تعاقب میں پاکستان نے 49 رنز کا اچھا آغاز کیا، جہاں منیبہ علی نے 25 اور گل فیروزہ نے 23 رنز بنائے۔ تاہم گل فیروزہ کے آؤٹ ہونے کے بعد پاکستانی بیٹنگ لائن مشکلات کا شکار ہوگئی اور ٹیم 49 رنز بغیر نقصان سے 84 رنز پر 8 وکٹیں گنوا بیٹھی۔

بنگلہ دیش کی جانب سے سنجیدہ اختر میگھلا اور ناہیدہ اختر نے 3، 3 وکٹیں حاصل کیں۔ رابعہ خان اور ریتو مونی نے ایک، ایک کھلاڑی کو آؤٹ کیا۔

پاکستانی ٹیم مقررہ 20 اوورز میں 8 وکٹوں کے نقصان پر 100 رنز ہی بنا سکی اور میچ 23 رنز سے ہار گئی۔