ایرانی وزیر خارجہ کی اہم دورے پر بیجنگ آمد، چینی ہم منصب سے ملاقات ہوگی

ایران کے وزیر خارجہ عباس عراقچی چین کے دارالحکومت بیجنگ پہنچ گئے ہیں جہاں وہ اپنے چینی ہم منصب وانگ یی کے ساتھ اہم ملاقات کریں گے۔

چینی وزیر خارجہ وانگ یی پہلے ہی امریکا اور اسرائیل کی جانب سے ایران کے خلاف جنگی کارروائیوں کو ’غیر قانونی‘ قرار دے چکے ہیں جس سے دونوں ممالک کے درمیان سفارتی ہم آہنگی مزید واضح ہوئی ہے۔

یہ دورہ ایسے وقت میں ہو رہا ہے جب چین ایران کے تیل کا ایک بڑا خریدار ہے اور امریکی پابندیوں کے باوجود تہران سے توانائی کی خریداری جاری رکھے ہوئے ہے۔

دوسری جانب امریکا ایران کی آمدن کو محدود کرنے اور اس کی معیشت پر دباؤ بڑھانے کی کوشش کر رہا ہے۔

ماہرین کے مطابق ایران اور چین کے درمیان یہ ملاقات خطے کی موجودہ کشیدہ صورتحال میں انتہائی اہم سمجھی جا رہی ہے، کیونکہ دونوں ممالک عالمی توانائی منڈی اور مشرق وسطیٰ کی سیاست میں اہم کردار ادا کر رہے ہیں۔