بجٹ اجلاس کے بائیکاٹ کا فیصلہ واپس، محسن نقوی نے بلاول بھٹو کو منالیا

چیئرمین پیپلز پارٹی بلاول بھٹو زرداری نے وفاقی وزیرِ داخلہ محسن نقوی سے ملاقات کے بعد بجٹ اجلاس کے بائیکاٹ کا اعلان واپس لے لیا ہے۔

جمعے کو وفاقی کابینہ کے اجلاس کے بعد یہ خبر سامنے آئی تھی کہ چیئرمین پیپلز پارٹی بلاول بھٹو زرداری نے وفاقی بجٹ اجلاس کے بائیکاٹ کا فیصلہ کیا ہے۔

بلاول بھٹو کا کہنا تھا کہ گلگت بلتستان میں ہمارا مینڈنٹ چوری کرنے کی کوشش کی گئی ہے، ایسا نہیں ہو سکتا کہ ایک طرف ہمارا مینڈیٹ چوری ہو اور دوسری طرف ہم بیٹھ کر تالیاں بجاتے رہیں۔

سماجی رابطے کی ویب سائٹ ’ایکس‘ پر جاری بیان میں مؤقف اپنایا گیا کہ بجٹ اجلاس کے بائیکاٹ کا فیصلہ صرف بلاول بھٹو زرداری کی عدم شرکت تک محدود ہے، پارٹی کے دیگر اراکین اجلاس میں شریک ہوں گے۔

ترجمان پیپلز پارٹی نے کہا کہ بجٹ اجلاس میں پیپلز پارٹی کے کچھ اراکین شریک ہوں گے جب کہ قومی مفاد کے تحت پی پی پی بجٹ پراسس کا حصہ ہوگی۔

پیپلز پارٹی کی جانب سے بجٹ اجلاس کا مکمل بائیکاٹ نہیں کیا جائے گا تاہم قومی اسمبلی کے اجلاس میں پارٹی کے چند اراکین نمائندگی کریں گے جب کہ بلاول بھٹو زرداری اور دیگر سینئر رہنما اجلاس سے دور رہیں گے۔

واضح رہے کہ گلگت بلتستان کے انتخابات میں پیپلز پارٹی اکثریتی جماعت بن کر سامنے آئی تھی، تاہم اب مسلم لیگ ن آزاد امیدواروں کو ساتھ ملا کر حکومت سازی کے لیے منصوبہ بندی کررہی ہے۔